Storie de acrobazie aerie
Il monument realizât dal arch. Antoni Guarnieri dedicât ae Scuele di Acrobazie Aerie Coletive di Cjampfuarmit al è un avion FIAT G91 PAN. Al è stât screât tal 2000, pe ocasion des celebrazions dal 70m aniversari de Prime Scuele di Acrobazie Coletive e il 20m aniversari di fondazion de "Associazione Arma Aeronautica Nucleo di Campoformido". Storie in curt de acrobazie aerie militâr
La acrobazie aerie militâr e à vût il so prin tarlup li de scuele di Cjampfuarmit, sît dal I Stormo, ae fin dai agns ’20.
Il comandant, colonel Rino Corso Fougier, pionîr e il prin che al à inviât il svol acrobatic coletîf in Italie, al persuadè il Stât Maiôr de Reâl Aeronautiche di in chê volte che il pilote militâr perfet al varès podût doprâ l’avion ae miôr in câs di vuere dome se al ves vût une grande sigurece, paronance, sensibilitât e coordenazion in cualsisei aspiet dal svol. Al fo cussì che a vignirin formâts tai reparts di cjace une vore di patuliis cun impegns adestratîfs e dimostratîfs tes ocasions des plui impuartantis manifestazions in Italie e tal forest. Vuê o ricuardin ancjemò i nons di Cavallino Rampante, Getti Tonanti, Diavoli Rossi e Lancieri Neri, jentrâts aromai te liende. Il Stât Maiôr al decidè tal 1961 di formâ une sole patulie acrobatiche nazionâl componude dai elements disponibii plui brâfs. A Rivolt, in Friûl, sot la direzion competente dal maiôr Mario Squarcina, al vignì inmaneât il 313° Gruppo Addestramento Acrobatico "Frecce Tricolori" che vuê, cu la formazion di nûf velivui e un solist, e costituìs il plui numerôs grup acrobatic dal mont, cognossût da pardut tant che un dai plui prestigjôs. Di in chê volte "le Frecce" a son stadis in pratiche adotadis de buine int furlane che lis considere part integrante de realtât regjonâl e e partecipe ai lôr sucès cun svant e proferintjur simpri il lôr sostegn.
